ဘယ်သူတွေကြောင့် ဘာအကြောင်းတွေကြောင့်လို့ စွပ်စွဲချက်တွေ တင်မနေချင်တော့ပေမယ့် ကျမသည်လိုပြောင်းလဲလာတာ ဘာကြောင့်လဲ ကျမသိချင်ပါသည်။ တစ်နေ့တော့ပေါ့။ ဘယ်လိုခံစားချက်မျိုးမဆို မျိုသိပ်မထားတတ်တာနဲ့ ခံစားချက်အတိုင်း တုံ့ပြန်တတ်တဲ့ အကျင့် ဘယ်လိုပျောက်သွားလဲပေါ့။
ဘာပဲပြောပြောပါလေ။ ဒီသစ်ပင်လေးက ခဏတဖြုတ် သို့မဟုတ် ရှေ့ဆက်မယ့် အချိန်အတိုင်းအတာတိုလေး တစ်ခုထိတော့ ငြိမ်းချမ်းမှုပေးနိုင်တာပဲ။ ဒီအပင်လေးအောက်မှာပဲ. . မျက်ရည်တွေ ကျဖူးတယ်။ 'တက်' ခေါက်ဖူးတယ်။ လှိုင်းတံပိုးလိုကြွလာတဲ့ ဒေါသနဲ့မခံမရပ်နိုင်ဖြစ်မှုတွေကို ဖြန့်ကျဲထုတ်ထားခဲ့ဖူးတယ်။ အသေးစားအဆင်မပြေမှုတွေကို အသက်ပြင်းပြင်းနဲ့တူတူ ရှုသွင်း ရှုထုတ်ခဲ့ရတယ်။ ကုန်ကုန်ပြောရရင် သည်းမခံနိုင်တော့လို့ အော်ငိုတဲ့အခါလဲ ဒီသစ်ပင်လေးက တည်တည်ငြိမ်ငြိမ်ပဲ ကျမကို ငုံ့ကြည့်အားပေးနေခဲ့တယ်။
ပထမအကြိမ်။ ဒုတိယအကြိမ်။ တတိယအကြိမ်. . . နောက် အကြိမ်ပေါင်းများစွာ ကြာပြီးသည့်နောက်မှာတော့ ဒီသစ်ပင်လေးကို ကျမ ရင်းနှီးလာခဲ့ပြီ။ သူငယ်ချင်းတစ်ယောက်လို ခံစားလာရပြီ။ ဒီသစ်ပင်လေးအောက်မှာ အဆိုးတွေပဲ ရှိခဲ့တာမဟုတ်ဘူး။ အကောင်းတွေလဲ ရှိခဲ့ဖူးတယ် ဆိုတာ ကျမ သတိတရရှိလာတတ်ပြီ။ ဒီသစ်ပင်လေးအောက်မှာပဲ ကျမ သူ့ပေါင်ပေါ်ခေါင်းအုံးအိပ် သူ့မျက်နှာကို ငေးကြည့်ပြီး သူ့အားပေးသံကို နားထောင်ခဲ့ဖူးသည်။ ကျမကို သူလက်သည်းညှပ်ပေးခဲ့တာလဲ ဒီသစ်ပင်လေးအောက်မှာပဲ ဖြစ်သည်။
 |
| http://www.oilartsell.com |
ဘာပဲပြောပြော ဒီသစ်ပင်လေးကို ကျေးဇူးစကားတော့ ပြောရပေလိမ့်မည်။ မမျှော်လင့်ပဲ ကျမဘ၀အတွက် အမှတ်တရဖြစ်လာတဲ့ ဒီသစ်ပင်လေးကို ပန်းချီမဆွဲတတ်တဲ့ ကျမ ဓာတ်ပုံတော့ ရိုက်ယူထားသင့်သည်။ ဒီသစ်ပင်လေးက ကျမကို စိတ်သက်မှုပဲပေးခဲ့တာ မဟုတ်ဘူး. . . ကျမရဲ့အတွေးတွေကိုလဲ နယ်ချဲ့စေခဲ့သည်ပဲလေ။
ရေနံ့သာ။
No comments:
Post a Comment